ప్రశ్న: హిందూ మతాచారాల ప్రకారం పాములు పాలు తాగుతాయి. పాములు నిజంగానే పాలు తాగుతాయా?

ప్రశ్న: - హిందూ మతాచారాల ప్రకారం పాములు పాలు తాగుతాయి. పాములు నిజంగానే పాలు తాగుతాయా?

                   జవాబు : - మతాచారాలు, నాగులచవితి పండుగ సమయాల్లోనే కాదు, 'పాముకు పాలుపోసి పెంచినట్లు' అన్న సామెత కూడా ప్రచారంలో వుంది. పాములు పాలు తాగవు. ఇది శాస్త్ర పరిజ్ఞానం. పాలను తాగే యంత్రాంగం పాముల నోళ్లకు లేదు. పాములు, పదేపదే చీలిక ఉన్న నాలుకలాంటి అవయవాన్ని బయటకు చాచి లోపలికి ముడుచుకోవడాన్ని గమనిస్తాము. నిజానికి అది నాలుక కాదు. అది ఒక రకంగా పాము ముక్కు అనగలం. వాసన చూసే ఇంద్రియావయవం ఎక్కడ వున్నా దాన్ని నాసికము లేదా ముక్కు అని అనవలసిందేనని తీర్మానిస్తే పాము నోట నాలుకలాగా బయటి కి లోపలికి వచ్చేదే నాసికం. ఎందుకంటే ఆ అవయవంతోనే పాములు పరిసరాల్లో వున్న రసాయనిక ధాతువుల్ని పసిగడతాయి. పాముకు మామూలుగానే కప్పలకు ఉన్నట్టే పెదాలపైన ముక్కు రంధ్రాలున్నా అవి ముక్కు చేయవలసిన పనుల్ని సమర్థవంతంగా చేయవు. అంతేకాదు. పాము తలకు అటుయిటూ చెవుల్లాగా కూడా కొంత లోతట్టు ప్రాంతాలుంటాయి. కానీ అవి చెవులు కావు. మతాచారాల్లోను, వాడకంలోను బాగా శ్రద్ధగా, సునిశితంగా వినేవాడిని 'వీడివి పాము చెవుల్రా' అంటూ కితాబులిస్తుంటారు. నిజానికి పాము చెవులకు వినికిడి సామర్థ్యం లేదు. కాబట్టి వినికిడి శక్తిలేని బధిరుడిని 'వీడికి పాము చెవుల్రా' అనాలి. ఎందుకంటే బధిరులకు అందరికిలాగే చెవులున్నా అవి వినలేని చెవులు. పాములకు కూడా చెవులున్నట్లే అనిపించినా అవి వినలేని వధ్య (Vastegial) చెవులు. ఏ పామూ నాగస్వరం చేసే శబ్దాలను వినలేదు.
పురాణాల్లోనే క్లోనింగ్‌ ఉందంటూ, రాకెట్లు ఉన్నాయంటూ, అవయవమార్పిడి ఉందంటూ చంకలు చర్చుకునే మతవాదులు, అవే మత గ్రంథాల్లో సాధారణ విజ్ఞాన శాస్త్రాల పరిధిలో ఉండే 'పాము-పాలు త్రాగదు', 'పాములు వినలేవు', 'మనిషిని నిట్టనిలువుగా చీల్చి అటూయిటూ పడేస్తే తిరిగి అతుక్కోవు' (జరాసంధుడు), 'అగ్నిలో దూకిన మనిషికి చర్మం కాలక మానదు' (సీత అగ్నిప్రవేశం), 'ఒకే వ్యక్తి ఏకకాలంలో ఎనిమిది మంది దగ్గర ఉండలేడు' (శ్రీకృష్ణుడి అష్టభార్యల శృంగార లీలలు), 'మనుషుల ప్రాణాలు చిలుకల్లో వుండవు' (మాయల ఫకీరు) మొదలయిన వెన్నింటినో అశాస్త్రీయంగా ఎందుకు కొట్టిపారెయ్యరు? శాస్త్రానికి దగ్గరగా వున్న వాటిని పట్టుకొని 'ఈ విజ్ఞానం మనకు ముందే తెలుసు, మన వేదాల్లో, ఉపనిషత్తుల్లో అన్నీ వున్నాయి' అన్న వాళ్లు నిజంగానే శాస్త్రాన్ని వైజ్ఞానిక ప్రతిపత్తిని గౌరవించిన వాళ్లయితే పైన పేర్కొన్న అశాస్త్రీయ అంశాలతోపాటు పునర్జన్మ, గతజన్మ, జ్యోతిష్యశాస్త్రం, బాబాలు, ఉంగరాలు తీయడం, పాములు పాలు తాగడం వంటివి అశాస్త్రీయాలని కూడా ప్రకటించాలి. కానీ 'మెలితిరిగి వున్నా నాదే' అన్నట్టు అబద్ధాలూ వారికి నిజమే. నిజాలు కూడా ఎపుడో తెలిసిన నిజాలే! అంటే పచ్చి అవకాశవాదమన్నమాట. నాగుల చవితి నాడు అమ్మలక్కలు అందరూ పుట్టల దగ్గరకెళ్లి పుట్టల్లో ఉన్న పాములు (అదేదో విధిగా నాగుపాములే ఉండాలన్నట్లు) పాలు తాగుతాయన్న అశాస్త్రీయ భావాలతో పాలు పోస్తారు. అక్కడ నిజంగా పాములు ఉన్నట్లయితే (అవి నాగుబాములయినా మరే పాములయినా) చచ్చి ఊరుకుంటాయి. ఒక పరిశోధన ప్రకారం నాగుల చవితి అనంతరం పొలాలు, మైదాన ప్రాంతాలు, పుట్టల పరిసరాల్లో ఎక్కువ పాముల శవాలు కనిపించాయి. ఇలా అదనపు పాముల ప్రాణహానికి, వినాశనానికి కారణం నాగులచవితి నాడు పుట్టల్లో పాలు పోయడం వల్లనే అవి ఊపిరి ఆడక చనిపోయాయని తేలింది. దేశంలో వున్న శతకోటి మూఢ నమ్మకాల్లో పాములు పాలు తాగుతాయనుకోవడం కూడా ఒకటి. 

- ప్రొ|| ఎ. రామచంద్రయ్య
    సంపాదకులు, 
చెకుముకి, జనవిజ్ఞాన వేదిక.
email: allikayala@gmail.com                                    సేకరణ : రంగ ప్రశాంత్,  సామాజిక కార్యకర్త..